O NOSO COMPROMISO COA CREACIÓN ACTUAL

No ano 2022, tras o noso primeiro encargo dunha obra para cuarteto de saxofóns, fixamos un dos nosos principais compromisos: apoiar e difundir a creación actual. Desde entón, mantivemos o obxectivo de encargar e estrear, cando menos, unha obra cada ano. Neste artigo do blog contamos como o fixemos e por que o seguiremos facendo no futuro.

Fotografía e edición de Inma del Valle

Todo comezou cun simple correo dirixido a Eduardo Soutullo, un compositor que nos interesaba e que algúns de nós xa coñeciamos. Para a nosa sorpresa, Eduardo non só nos respondeu con interese, senón que tamén nos deu a coñecer unha vía de financiamento que sería clave nos anos vindeiros: as axudas á música e á danza do Instituto Nacional das Artes Escénicas e da Música (INAEM). Grazas ao seu apoio, conseguimos a subvención e puidemos comezar a facer realidade o noso obxectivo.

Portada da obra Sax Quartet de Eduardo Soutullo, encargada por Lítore Quartet. Estreada no XIV Ciclo de Música Actual de Badaxoz, Casa da Cultura de Puebla de la Calzada, 12/11/2022.

O mesmo día que estreamos Sax Quartet de Eduardo Soutullo en Badaxoz, tamén tivemos o pracer de dar vida á obra June de María José Fontán e de traballar coa compositora.

 Portada da obra June de María José Fontán. Estreada por Lítore Quartet no XIV Ciclo de Música Actual de Badaxoz, Casa da Cultura de Puebla de la Calzada, 12/11/2022

Grazas ao INAEM, puidemos traballar de primeira man con compositores de recoñecemento internacional. No ano 2023 fixémolo co catalán Salvador Brotons; en 2024, co galego Brais González; e en 2025, co madrileño Mauricio Sotelo.

 Portada da obra Resiliència de Salvador Brotons, encargada por Lítore Quartet. Estreada na Capela do Mas Sant Joan de Sant Joan de Vilatorrada, 17/11/2023

 Portada da obra Selkie, encargada por Lítore Quartet. Estreada no Auditorio do Centro Dotacional Torroso-Mos, 17/12/2024

 Portada da obra Cantes de Agua y Duelo, encargada por Lítore Quartet. Estreada na sala de actos do Museo do Renacemento “La Gòtica” de Molins de Rei, 13/11/2025

No ano 2023, o noso amigo e compañeiro no Conservatori Superior de les Illes Balears, Pau Cladera, compuxo a obra Danses i Festes para nós.

 Portada da obra Danses i Festes de Pau Cladera. Estreada no Teatro Municipal de Llubí, Mallorca, 06/05/2023

Neste 2026 decidimos lanzar unha convocatoria dirixida a compositoras de nacionalidade española, co obxectivo de achegarnos aos nosos valores e defender a equidade nas artes. Moi pronto coñeceremos a compositora que traballará connosco para continuar desenvolvendo o noso obxectivo de promover a creación actual. Ademais, nos vindeiros anos gravaremos parte destas estreas nun álbum. Así que isto é só o comezo!