LÍTORE NO VIGO SAX FORUM!

Entre o 30 de xuño e o 6 de xullo celebrouse o Vigo Sax Forum, un curso de saxofón fantástico que ten lugar cada ano nesta cidade da costa galega. Nesta edición tivemos o pracer de participar como profesorado e artistas. Neste artigo do blog contámosvos todos os detalles da experiencia!

Cartel do concerto de Lítore Quartet emmarcat no Vigo Sax Forum 2025.

O martes 1 de xullo comezamos as clases no Vigo Sax Forum, con sede no Conservatorio Profesional de Música de Valladares. Alí tivemos a oportunidade de impartir clases a alumnado de nivel elemental e profesional, así como a varios grupos de música de cámara. As novas xeracións veñen máis preparadas ca nunca! Ademais, ese primeiro día tamén ofrecemos unha charla sobre a actividade e xestión dunha agrupación de música de cámara a través da nosa propia experiencia.

Lítore Quartet imparte unha charla sobre a xestión dun grupo de música de cámara. Conservatorio de Valladares, 01/07/2025.

Pola tarde, ofrecemos un concerto enmarcado nas actividades do curso no Auditorio de Valladares. Arredor dun público cheo de saxofonistas e melómanos locais, interpretamos obras de Eugène Bozza, Hèctor Parra, Alfred Desenclos, William Albright e Ferenc Farkas.

O mércores 2 de xullo, ademais de continuar coas clases, tivemos o privilexio de tocar con Ángel Soria, actual catedrático de saxofón do Conservatorio Superior de Música de Navarra e unha figura de referencia no mundo do saxofón. Con el como solista, interpretamos o Concerto para óboe en re menor de Alessandro Marcello, unha fermosa obra de comezos do século XVIII. Grazas, Ángel! Foi unha inspiración compartir estes días contigo e tocar ao teu carón.

Lítore Quartet e Ángel Soria, despois do seu primeiro ensaio xuntos. Conservatorio de Valladares, 02/07/2025.

Durante o resto dos días do curso continuamos cun horario intenso de clases e a convivencia co resto do profesorado e alumnado. Foi un pracer pasar estes días con Roberto Pacheco, Judith Montero, Henrique Portovedo e Nicolas Arsenijevic; grandes mestres e persoas coas que compartimos conversas moi agradables.

Esta foi a nosa primeira experiencia como docentes representando ao Lítore Quartet, e gozamos e aprendemos moitísimo. Queremos dar as grazas especialmente a Tomás Alonso, que tamén foi o noso profesor na etapa de estudantes en Palma, por convidarnos ao curso e confiar no noso traballo. Parabéns por esta sexta edición do curso, que encheu de saxofón e cultura toda a área de Vigo. Vémonos o ano que vén!